قصة واقعية عن طفل متفوق في مدرسته، مازن ابنى من صغره متفوق
مازن ابنى من صغره متفوق في مدرسته وهادى الطبع وبشهاده المدرسين عنده دايما لما بسألهم عليه .. من يومين مازن بلغنى انهم بلغوه في المدرسة بإستدعاء ولى الامر سألته ايه السبب قالى مش عارف وحسيت انه بيهرب من الاجابة .. مكررتش عليه السؤال تانى ومحبتش اضغط عليه .. من خوفى وقلقى عليه وبحكم تواصلى الدائم مع كل المدرسين عنده في المدرسة كلمتهم وكان ردهم ان مازن من افضل الطلاب وهادى دايما ومش بيعمل اى مشاكل ..كلهم كان عندهم نفس الرد .. إلا مدرس واحد لما سألته قالى محتاجك تحضر يوم فى المدرسة أتكلم معاك .. قلقت وقتها وسألته مازن عمل أى مشكلة في المدرسة ؟ .. رد قالى ان الكلام مش هينفع في التليفون .. وقتها زاد الخوف وزاد القلق .. قولتله هاخد اجازة من الشغل وهقابل حضرتك بكرا تانى يوم وصلت المدرسة وقابلت المدرس وبسأله على مازن .. رد قالى هو ليه مازن مجاش المدرسة النهاردة ؟؟ لحظة ذهول من السؤال لانى شايف مازن نازل من البيت الصبح ورايح المدرسة ..
سألته يعنى ايه مجاش انا شوفته بعينى وهوا نازل جاى المدرسة .. قالى زي ما قولت لحضرتك كده مازن مجاش المدرسة النهاردة .. اتصلت على أم مازن ف البيت بسألها مازن عندك ؟؟ .. ردت قالت عندى ازاى .. مازن في المدرسة .. قولتلها تمام خلاص وقفلت وانا جوايا اسئلة كتير ملهاش اجابة قفلت معاها وبسأل المدرس ابنى فين حضرتك ؟؟ رد قالى ابنك في أمااان متخفش !!! .. ضرباات قلبى بتزيد وانا بسأله يعنى ايه مخفش .. انت تعرف مكااانه ؟؟ رد قالى .. كلنا عارفين مكانه .. سألته كلكم مين ومكانه فين رد عليا ارجوك انا مش فاهم حاجه قالى اهدى يا أبو مازن وانا هقولك على مكان مازن .. قولتله قولى بسرعة ابنى مكانه فين .. قالى هتطلع الدور التانى اخر فصل في الممر هتلاقى مازن جريت وانا مش عارف هطلع منين وهروح الفصل ازاى بس بجري وبنادى على مازن بصوت عاالى ووصلت فى النهاية للفصل ومفيش مازن والفصل فاضى .. ابنى فين ...انت فين يا مازن جريت من الفصل وانا خارج قميصى شبك في مسمار ف الباب ووالقميص اتقطع واتجرحت في دراعى ..
مسكت مكان الجرح بإيدى وبجرى ادور على مازن فجأة سمعت صوت مازن وانا بجرى بيقولى يا بابا .. وقفت مرة واحدة اسمع الصوت تاني لقيت الصوت جاى من ورايا بس الصوت كان واطى المرة التانية وسمعت صوت مازن بيعيط .. لفيت بسرعة لقيت مازن ورايا .. جريت عليه سألته انت كويس يا حبيبى ؟ مازن بيعيط وبيبصلى نظرات غريبة اول مرة اشوفها عليه واحسها منه .. سألته تانى انت كويس يا حبيبى ؟؟ رد عليا بنبرة صوت كلها انتصار وقالى انا مكنتش كويس قبل كده يا بابا وبقيت كويس دلوقتى بعد ما شوفت خوفك وقلقك عليا قولتله مكنتش كويس ازاى وكنت فين وانا بدور عليك الوقت ده كله قالى انا هحكيلك يا بابا انا كان عندى مشكلة وكلمت المدرس بتاعى وقولتله انا حاسس ان بابا مش بيخاف عليا زي كل أب بيخاف على ابنه والموضوع ده عاملى مشكلة فى حياتى .. والمدرس قالى انا هحاول احل المشكلة اللي عندك وهخليك تشوف خوف ابوك وقلقه عليك بعينك واتفق معايا على كل حاجة لحد ما شوفتك وانت قلقان عليا وعشان كده كنت بعيط أخدت مازن فى حضنى وقولتله متعيطش يا حبيبى ولازم تبقى عارف انى اكيد طول الوقت بخاف عليك حتى لو مش ببينلك خوفى وقلقى عليك مشيت انا ومازن من المدرسة وانا حاسس انى منتصر لما قدرت أفرح ابنى وأحل مشكلة كبيرة كانت عنده وأخليه يحس احساس كان مفتقده حتى لو الاحساس ده كان على حساب تعبى وقلقى وخوفى مش مهم .. بس الاهم ان مازن دلوقتى مطمن _________________________________________
تمنيت وأن لو كانت هذه القصة حقيقية حتى أصل الى نفس الشعور .. ولكن أحداث القصة كاملة كانت من وحى خيالى