قصة عودة ميت

اوحش حاجة ممكن تحصل لاي إنسان هو ان حياته تتقلب فجاة وتدمر وتبوظ وهو واقف مش عارف يعمل حاجه…
انا عايشة حياة سعيدة وهادية .انا وجوزي نبيل وابني ياسر وبنتي الصغيرة مريم . كنا عايشين في حالنا ومبسوطين وبنحب بعض كلنا ومفيش بنا اي مشاكل.
وفضلت حياتنا هادية كده وجميلة لفترة كبيرة.لحد ماجه اليوم المشؤوم .ابني خرج يلعب مع اصحابه .خرج واخد الكورة بتاعته معاه.عدي وقت كتير اوي ومرجعش .بصراحة قلقت عليه بس مش عارفة هو راح يلعب فين علشان انزل ادور عليه.جوزي رجع من شغله وسال عليه .قولتله انه خرج يلعب مع اصحابه ومرضتش اقوله انه اتاخر عشان ميقلقش هو كمان.دخلت المطبخ احضر الاكل واما خرجت لقيت جوزي قاعد علي الارض ودموعه مغرقة وشه .والتليفون مرمي علي الارض جنب رجله.
جريت عليه عشان افهم في ايه.لقيته بيقولي بصوت مكسور ياسر مات .ابننا مات.
اتصدمت ومكنتش مصدقة انه مات. وانهارت انا كمان .
روحنا استلمنا الجثة من المستشفي. وهناك الدكتور قلنا انه مات نتيجة صدمة سيارة كانت ماشية بسرعة كبيرة وخبطته وهو بيعدي الطريق وعلى ما وصل المستشفى كان مات ومقدرناش نعمله حاجة البقية في حياتكم.ده كان كلام الدكتور.

اخدنا الجثة وخرجنا تسريح الدفن وكنا خلاص رايحين ندفنه في المدافن بتاعت العيلة .لكن في الطريق ،ابوه قرر قرار غريب اوي .وهو أنه هيدفن الجثة عندنا في جنينة البيت . حاولت كتير اكلمه عشان اقنعه ميعملش كده ، خصوصاً إني مفهمتش هو ليه عايز يعمل حاجة زي كده .بس قولت لنفسي إن الصدمة كبيرة عليه .وهو حابب يكون القبر قريب منه عشان كل مايوحشه يروح يقعد جنبه شوية.
كااي ام حزنت جدا علي موت ابني لكني بعد فترة قدرت اتاقلم وادعي ربنا انه يعوضني خير علي صبري.وقولت لازم اخد بالي من بيتي وجوزي وبنتي مريم.لكن جوزي مقدرش يتقبل فكرة موت ياسر.وبقي كل يوم يروح يقعد بالساعات جنب القبر .وكل مااحاول اكلمه وافهمه انه مات ولازم نكمل حياتنا علي الاساس ده. لكنه كان بيرفض ويغضب جامد ويسيب البيت ويمشي.وفي يوم من الايام لقيته جاي من بره وكان سعيد اوي .وبيقولي افرحي لقيت الحل الي هنرجع بيه ابننا تاني. اتصدمت صدمة عمري وانا بسمعه بيقول الكلام الغريب ده. وكأنه اتجنن ومبقاش طبيعي ولا حتي فاهم هو بيقول ايه ولا بيعمل ايه. رديت عليه بهدوء عشان يفهمني.
قولتله
"لا مفيش حاجة اسمها كده ابننا مات وخلاص انتهي الامر .ليه مصمم تكمل في جنانك ده . ليه عايز تتعبني وتتعب نفسك في حاجة لا يمكن تحصل.
رد.اسكتي انتي متفهميش حاجة بقولك لقيت الحل وهتعرفي اني مش بخرف لما أنفذه وابننا يرجع تاني لحضننا.
لما حسيت إن مفيش فايدة من الكلام معاه،

سبته يكمل جنانه مع نفس ودخلت قعدت مع مريم لاني بحاول بكل الطرق ابعدها عن جنان ابوها ده أحسن تتعدي منه، وكانت على طول بتسأل عن اللي بباها بيعمله وكنت بحاول افهمها إن الصدمة كانت شديدة عليه بس. لكنه هيتحسن مع الوقت ويرجع لطبيعته.. بعد ما البنت نامت خرجت عشان اشوفه بيعمل إيه ، ولما خرجت لقيته قافل كل أضواء البيت ومولع شمع في كل ركن وكل زاوية موجودة في البيت.وكمان جايب انواع بخور كتير جدا .وكمان جاب تماثيل خشب شكلها مخيف اوى ومشوهة. ومرعبة.وحول البيت لمكان بشع وكأنه بيت من بيوت السحرة وعبدة الشيطان. وكأني دخلت معبد يهودي او حاجة زي كده.
بقيت بترعب وانا قاعدة في البيت .ولما سالته هو احنا هنفضل في القرف ده كتير قالي
" ايوه هنفضل فيه لحد ما الشيخ جعفر ييجي ويرجع ابننا تاني. هو الي طلب مني اعمل كده في البيت عشان اهيئ جو يستقبل الروح لماترجع من تاني.
حاولت افوقه وافهمه ان اللي بيعمله ده ملوش لازمة وان الشيخ اللي بيقول عليه ده اكيد نصاب .ومش هيعمل حاجة من اللي هو واعدة بيها .واننا ممكن نتأذي لو مشينا وراه. وقولته بص لبنتك اللي ممكن يحصلها حاجة من اللي بتعمله في البيت ده وساعتها هنبقي فقدنا الاتنين مش واحد بس. مكنش قادر يسمعني ولا يفهمني وتقريباً اللي إسمه جعفر ده عمله غسيل مخ .ورفض جوزي انه يسمع لصوت العقل وصمم يكمل في الي بدائه…
بعدها بيومين كنت قاعدة مع مريم في اوضتها بذاكر لها وفجأة في ريحة وحشة أوي انتشرت في البيت. قولت أكيد جوزي بيعمل حاجة مجنونة من الحاجات اللي بقي مواظب عليها الفترة اللي فاتت دي. طلبت من البنت متخرجش من اوضتها خالص لحد ما أطلع أشوف في ايه.
مشيت ورا الريحة ولقيتها وكانت جاية من الجنينة. بصيت لقيت جوزي فاتح قبر ياسر وواقف قدامه ومعاه طبق كبير فيه جمرات نار وعليه بخور من فوق مطلع دخان كتير اوي .ارتبكت و مبقتش مصدقة اللي بيعمله الايام دي هو خلاص كده اتجنن خالص وانا مبقتش قادرة استحمل جنانه ده.قررت اروح اكلمه وافهمه انه لو مبطلش جنانه ده انا هاخد بنتي وامشي من البيت للأبد. مشيت نحيته وانا متعصبة ومش طايقة نفسي.
"انت ايه يااخي ! خلاص اتجننت خالص ايه اللي انت عامله ده ؟ في حد عاقل في الدنيا يفتح قبر علي واحد ميت؟

"هو ميت دلوقتي بس بعد شوية مش هيبقي ميت ، هيصحي وهيعيش معانا ونكون مبسوطين من تاني.
"احنا مش هنكون مبسوطين إلا لو انت بطلت الجنان اللي انت بتعمله ده من يوم ما ابنك مات..
"ومش هبطل. مش هبطل غير لما يرجع واشوفه قدامي واخده في حضني من تاني أنا ابني اتسرق مني على غلفة وأنا مش ههدا غير لما يرجع.
كنت مستغربة اوي من تصميمه ده. وقولتله تقدر تقولي هيرجع ازاي؟ هترجعه بالبخور والتماثيل الغريبة اللي مليت البيت بيهت. ولا بالحاجات الغريبة اللي محدش فاهم ايه دي..
"ومش هتفهمي ، لاني مش انا اللي هرجعه ، انا معرفش اعمل كده. لا في اللي يعرف ويقدر ووعدني إنه هيرجعولي من تاني..
"انت مفيش فايدة فيك بجد انا خلاص جبت اخري وهسبلك البيت كله وامشي..
وقبل مااخطي خطوة واحدة لقيت راجل غريب بيدخل من الباب .وبينادي علي جوزي .كان راجل غريب اول مره اشوفه .شكله كده مريب وفيه حاجة غلط.لابس عمامة فوق رأسه و جلابية طويلة حاطة في الأرض. عنيه فيهم خبث او لؤم مش عارفة بس شكلهم ميريحش خالص عنده حوالي خمسين سنة وجسمه تخين شوية وكان عريض لكنه قصير مش طويل. .نده علي جوزي .وهو اول ماسمع صوته طلع يجري عليه بسرعه .ويقول له اتفضل يا شيخنا اتفضل .انا عملت كل الي انت امرت بيه .وفتحت القبر بقالي ييجي ساعة اهو وزي منتا قولت بالظبط الجثة عضم بس مفيهاش لحم غير في الوش والدراعين بس .هو انت عرفت ازاي يا مولانا انها هتبقى بالشكل ده ؟
"لا بلاش الاسئلة اللي تزعلني منك دي.
"خلاص يا سيدنا الشيخ والنبي ما تزعل أنا آسف.
بص للسما وقال
"والنهارده القمر كامل زي ماحنا عايزين بالظبط المراد هيتم لو كل حاجه اتعملت صح. ودلوقتي بقي سيبني أشوف شغلي ومش عايز أي حاجة تشتت تركيزي. ولا صوت ولا حركة مفهوم..
"مفهوم طبعاً يامولانا مش هتسمع اي صوت خالص ولا حد فينا هيعمل اي حاجه تشتت تركيزك..
" تمام. يلا بقي
خد مراتك واقف عند باب البيت ومتجيش غير لما انده عليك ومهما تسمع او تشوف متجيش غير لما انده عليك.
حاضر .الي تقوله عليه ياسيدنا يتنفذ حالا.
خدني من ايدي ومشى ناحية باب الفيلا.وقفت انا وجوزي بعيد عن القبر لكننا كنا شايفين ايه الي بيحصل.اول حاجة عملها الشيخ أنه قلع الجلابية والعمامة الي كان لابسها وفضل بس ببنطلون صوف لونه اسود .جسمه كله رسومات غريبة ومش مفهومة داخلة في بعضها وكأن حد قعد يشغبط علي جسمه كتير .. لكن كان في رسم وأحد واضح أوي زي الشمس.

وكان على رأسه وكان باين لان دماغه محلوق خالص ومفيهوش اي شعر .وفي نجمة كبيرة مرسومة فوق رأسه ومالكة دماغه كلها وفي نصها بالضبط كان في رسمة لعين كبيرة.. بس كانت مدارية عشان العمامة اللي لابسها.
بدا يقول كلام غريب مش مفهوم وصعب حتى يتنطق.صوته بيعلى كل شوية وتحسه أنه بيتعصب.
فجاة حسيت بحاجة غريبة بتحصل .بلمح اطياف وخيالات كده بتتحرك في البيت كله.جسمي بدا يرتعش من الخوف والقلق.حتي جوزي ظهر عليه الخوف اللي كان بيحاول يداريه من بدري. وهو بيحسس زيي بالخيالات اللي عماله تطلع من القبر وتنتشر في الجنينة كلها. وبتتحرك في كل حتي.
صوت الراجل بيعلى اكتر واكتر .وبدأ يخرج دخان من قبر ياسر. الدخان بيزيد كل شوية وكأن كان في حريقة كبيرة جوا و احنا مش شايفينها لكن ده مستمرش كتير لان بعد أقل من دقيقة واحدة.فجاة القبر ولع كله .وبيطلع نار شديدة اوي.مسكت في دراع جوزي من الخوف.النار بتزيد وصوت الراجل بيعلي.والخوف بيتملكني اكتر قلبي هيوقف.
وبقيت بسأل نفسي هو ازاي لسه عايش وسط النار الشديدة أوي اللي خارجة من القبر دي. دنا واقفة بعيد عنها بامتار وحاسة بسخونتها الشديدة. يعني المفروض يكون هو اتحول لكيس بلاستك سايح وسط النار دلوقتي. لكن ده محصلش وفضل يتكلم ويقول كلامه الغريب ده بصوت عالي أوي..
وفجاة النار انطفت.ومبقاش فيه دخان والشيخ سكت. قلت لنفسي يمكن مات اخيراً بس جاي يموت بعد ما النار انطفت يعني دي حاجة غريبة اوي. لكنه اثبت لي عكس تفكيري. ولقيته بيخرج من القبر بهدوء وجسمه كله بيطلع دخان لونه اسود. والنجمه اللي على راسه لونها بقى احمر جامد اوي. كأنك جبت حاجة معدنية وحطيتها على النار فترة طويلة لحد ما سخنت وبقي لونها احمر. ازاي مش حاسس بألم مش فاهمه ازاي لسه عايش أصلا. ورجع لبس هدومه من تاني بكل هدوء وكأنه معملش حاجة خالص .وقتها بس قدرت اخد نفسي .
نده جعفر بصوت عالي على جوزي وقاله. بسرعة ولع بخور اكتر ولف بيه في البيت كله ومتسبش أي ضوء شغال خالص ضوء القمر كفاية الليلادي. وبدا جوزي ينفذ كلام جعفر وطفي كل النور في البيت، ولقيت مريم خارجة مرعوبة هي بتخاف من الضلمة علي طول. اخدتها في حضني وهديتها.
ولسه جعفر واقف علي باب القبر وبيقول كلامه الغريب لكن كان بصوت واطي المرادي.
بعد اكتر من ساعة على نفس الحالة.
صرخ جعفر بصوت عالي وهو بيقول أهلا نورت بيتك وارضك .
وبعدها شفت ظل بيخرج من القبر.الظل ده بتاع طفل في سن ياسر تقريبا بس مش قادرة احدد شكلة من هنا.قرب من الشيخ وباس ايده.والشيخ نده علي جوزي الي جري بسرعة نحيته.
ولقيته اخد الطفل الي خرج من القبر بالحضن وفضل يبوس فيه ويحضنه.وانا واقفة مستغربة ومش قادرة افهم اللي بيحصل.فجاة لقيت جوزي بينده عليا ويقولي تعالي شوفي ابنك .ابنك رجع تعالي خديه في حضنك، عشان تصدقي اني مش مجنون ولا كنت بقول اي كلام.
رحتله عشان اشوفه واتاكد اذا كان اللي بيقوله ده صح ولا لا.واندهشت لما شوفته هو فعلا ابني ياسر . نفس الطول ونفس الشكل. قربت منه وحضنته بس هو كان متسمر مكانه كأنه ميعرفنيش واول مرة يشوفني.اخدته ودخلته البيت ونبيل خرج يوصل الشيخ. قعدت قدام ياسر وعيني عليه كنت عايزة اشبع منه.تخيل ابنك يصحى بعد مايموت دي حاجه متتصدقش ابدا .
بس ياسر كانت حركاته غريبه ونظراته كأنه تايه ومش عارف المكان حتى لما حاول يمشي مكنش قادر يمشي كويس وكأنه لسه خارج من عملية او حاجة زي كده .نبيل رجع وقال اشيل بقي البخور والحاجات دي مبقاش ليها لزمة دلوقت.بس فجاة ياسر صرخ بصوت عالي اوي ومرعب.
لا سيب كل حاجة مكانها انا مقدرش اعيش من غيرها.فجأة كده حسيت ان ده لايمكن يكون ابني.لكني قلت لنفسي بعد اللي حصله لازم ياخد وقت عشان يرجع طبيعي من تاني.
كنت بحاول اكدب نفسي وأصدق إن اللي حصل ده معجزة مش اي حاجة تانية.
قولت اتعامل معاه عادي وهو هيبقي كويس ويرجع لطبيعته أكيد مع الوقت.

لكن للاسف ده محصلش .الولد بيسهر طول الليل ومبينمش غير لما النهار يطلع.أفعاله غريبة اوي بيفضل قاعد لوحده بالساعات مش بيتكلم مع حد.ولو حد كلمه يفضل باصصله بنظرات غريبة ومرعبة وميردش عليه. مكنش طبعاً بيخرج ولا يشوف ناس ولا جيران ولا حتى بيروح مدرسه. ازاي نقنع الناس إنه رجع من الموت فجأة كده. عشان كنا عارفين إن محدش هيصدق وممكن نقع في مشاكل كتير بسبب الموضوع ده قررننا نخبيه عن الكل لحد ما نشوف حل او حتي ناخد نفسنا ونروح مكان جديد محدش هناك يعرفنا خالص..
لكن المشاكل مكانتش من برا بس لا بقت من جوا اكتر دلوقتي.. لان الخيالات السودة الي كانت موجودة لما الشيخ كان هنا رجعت تاني واكتر كمان وبقيت بحس بيها موجودة وبتتحرك في البيت كله. وكأنها خلاص بقيت شريك معانا في البيت..
بس الاغرب من كده. إن في يوم صحيت بالليل .ورحت المطبخ عشان اشرب.لقيت ياسر قاعد بيتكلم مع خيال اسود منهم .انا اتسمرت مكاني ومبقتش عارفة انده عليه ولا ادخل وكأني مشوفتش حاجة.فجاة هو بص نحيتي وكانت عنيه حمرا اوي وشكلها يخوف.وبصوت عالي وغليظ قلي.ادخلي جوه بدل مااحرقك.
جريت وانا مرعوبة ودخلت الاوضه بسرعه وحكيت لجوزي علي اللي شفته.مكنش مصدقني وفضل يجادل فيها . وكعادته مصدقنيش في اي حاجه بحكيها له. وفضلت اعاني لوحدي من اللي بشوفه بيحصل في البيت وجوزى كمان كان بيشوف لكنه كان بيكدب نفسه. حتي اليوم اللي صحينا فيه الصبح وبنبص علي السقف لقينا اثار اقدام موجودة عليه ، بصتله وقولته ها لسه مش مصدق إن في حاجات غريبة بتحصل في البيت، البيت فيه حاجات بتقدر تمشي على السقف يانبيل ومش بعيد تكون دي آثار رجلين إبنك أو اللي أنت فاكره ابنك. ومكملتش كلامي لما لقيت ياسر طالع من اوضته وبيمشي ناحيتي وهو علي وشه غضب كبير أوي وبيقول.
"انا محتاج وقت عشان استجمع قوتي من تاني ومش هعمل كده غير لما انام كويس وانا مش عارف انام بسبب صوتك العالي ده. لو سمعت صوتك تاني متعرفيش انا ممكن اعمل إيه.
اتسمرت مكاني وبصيت لنبيل وكأني بقوله شوفت بنفسك.
وقتها نبيل حب يثبتلي إن مفيش حاجة ومجرد عصبية أطفال.
فقام واتوجه ناحية ياسر وقال له.
"انت ازاي تكلم أمك بالشكل ده اتفضل اتأسف لها يلا.
مردش عليه وبصله بقرف ودخل الاوضة ورزع الباب جامد أوي لدرجة إني حسيت إن الباب اتكسر فيها. قلت لنبيل
" ها لسه مش مقتنع برضه؟ ولا انت مش هتنقنع غير لما حد فينا يجراله حاجة ؟
رد عليا بارتباك.
"عادي طفل وكل الاطفال كده. وبعدها سبني وخرج راح شغله.
وفضلت انا قاعدة مرعوبة من الكائن الغريب اللي عامل فيها ابني ده قاعد فى اوضته. كنت بخوف على مريم أوي منه. لاني في يوم كنت في المطبخ بجهز الأكل و سمعت صوتها بتعيط جريت اشوف مالها. لقيت ياسر عندها في الاوضة وبيحاول يخنقها باديه، وهي مش قادرة تتنفس وكانت خلاص علي وشك إنها تفارق الحياة. جريت بسرعة ناحيته وحاولت اشيل ايده من على رقبتها. لكنه كان قوي بشكل غريب ازاي طفل وقوي كده. فضلت اشد فيه وهو مش راضي يسيبها خالص ، وعنيه كانت لونها أبيض صافي وكأنها بقت جفن بس ، فضلت اصرخ بصوت عالي وانا شايفة البنت روحها بتطلع في أيده
ياسر عندها في الاوضة وبيحاول يخنقها باديه، وهي مش قادرة تتنفس وكانت خلاص علي وشك إنها تفارق الحياة. جريت بسرعة نحيته وحاولت اشيل ايده من على رقبتها. لكنه كان قوي بشكل غريب ازاي طفل وقوي كده. فضلت اشد فيه وهو مش راضي يسيبها خالص ، وعنيه كانت لونها أبيض صافي وكأنها بقت جفن بس ، فضلت اصرخ بصوت عالي وانا شايفة البنت روحها بتطلع في أيده وانا مش قادرة اعملها اي حاجه.
فجأة لقيت عينيه رجعت طبيعية من تاني. وذقني لورا اترميت على الأرض وهو خرج من الاوضة وبيبصلي بقرف , قومت جريت علي البنت و فوقتها. وفضلت تعيط وهى بتقولي.
"هو ليه ياسر بيعمل كده ياماما انا مبقتش احبه زي الاول انا كنت فكراه جاي يلعب معايا لكني لقيته بيأذيني من غير ما اعمله حاجة.

ضميتها لحضني و طمنتها وبعدين قولتلها.
"اسمعي ياحبيبتي اللي عايش معانا ده مش ياسر اخوكي ده حد تاني. خدي بالك منه واوعي تقربي منه. لحد ما أشوف حل اخرجه بيه برا البيت ونخلص منه للأبد..
وفعلاً دورت كتير وسألت شيوخ كتير عن إزاي اخرج الكائن ده من بيتنا لكن محدش اداني أي رأي مفيد خالص كلهم مش فاهمين ازاي ده حصل او ازاي ممكن يحصل من الأول أصلا.
اضطريت استحمله لحد ما الاقي طريقة اخلص اخلص بيتي بيها منه.
بس الموضوع زاد عن حد أوي.
انا مبقتش اقدر انام بسبب الحاجات الغريبة اللي بيعملها في البيت.
انا وصل بيا الحال إني كنت بطبق باليومين تلاتة من غير ما انام ساعة واحدة.
كنت بحس بيه يخرج ويتحرك براحته في البيت بالليل. وفي يوم قررت أخرج واشوف ايه اللي بيحصل معاه برا . خصوصاً إنه بقي بيتغير خالص الأيام دي. حتى شكله نفسه بقي بيتغير عنيه بقت بتدخل لجوه اكتر. ولون جلده بيتحول للأزرق وكانه بيموت ..
وسمعت صوته وهو بيخرج من الاوضة وكان نبيل نايم جنبي مش حاسس بحاجة. فكرت اصحيه عشان يشوف معايا لكني خفت يعمل صوت وياسر يحس ويرجع يدخل اوضته تاني او يحصل اللي انا خايفة منه وهو أنه ياذي حد فينا لو اتعصب.
خرجت وراه لقيته مشي ناحية الجنينة. ووقف في الهواء بيبص للسماء نظرات غريبة وكأنه بيدور علي حاجة فيها. والقمر كان مكتمل اليوم ده نفس اليوم اللي خرج فيه من قبره قبل كده.
فضل مبحلق في السماء فترة كبيرة.
وبعدها التفت مرة واحدة وكأن في حد نده عليه. بس ملتفتش ناحيتي لا التفت بعيد عني. وبدأ يمشي بهدوء في الجنية وكأنه مش عايز حاجه تسمع صوت خطواته. بيمشي على أطراف صوابعه كأنه داخل يسرق ، ونزل بركبته على الأرض. وفضل باصص للأرض مدة كبيرة وكان مستمتع، لدرجة إني لقيت في ريالة بتخرج من بوقه كأنه شايف أكل قدامه . وقولت اقرب وأشوف هو شايف ايه. وفعلاً قربت ناحيته.
وبصيت ناحية المنطقة اللي هو مركز معاها اوي. وشفت مشهد غريب أوي. شوفت تعبان كبير بياكل فار. كنت مشمئزة اوي من اللي انا شيفاه بيحصل قدامي ده. وكنت مستغربة أوي وبسال نفسي ايه اللي جاب التعبان ده عندنا انا عمري ما شوفت تعبان أو أي نوع من الحشرات دي في بيتنا. لكن الاغرب من كده هو ليه مبسوط اوي كده وهو شايف التعبان ده بيبلع الفار.
كنت بشوف علامات النشوة علي وشه والفار بيحاول يقاوم ولكنه مش قادر والتعبان بيلتهمه . وكل ما الفأر يدخل في بوق التعبان اكتر كل ما علامات السعادة تزيد على وشه اكتر، بعد معاناة خلص المشهد أو كنت فكراه خلص. لما التعبان كان خلاص بلع الفار وكان ظاهر اوي في بطنه.
وقتها قلت خلاص هيقوم يمشي. لكن ده محصلش ولقيته بيقرب اكتر من التعبان وبيمسكه بايده. وقربه ناحية وشه وهو بيبصله بنشوة غريبة. وفجأة التعبان بخ سمه في عنين ياسر لكن الغريبة إنه متاثرش خالص وكأنه مفيش حاجه حصلت كأنه رشه بمياة مش سم ممكن يعمي اي حاجه. وبعدها بدأ التعبان يقرصه اكتر من مرة في دراعه عشان يسيبه. لكن مفيش فايدة مكنش حاسس باى حاجه. كنت مش قادرة افهم ازاي إنسان يتقرص اكتر من مرة من تعبان حجمه كبير كده. وميحسش بحاجة، لكني خلاص مبقاش عندي اي شك إنه مش انسان ولا يمكن يكون إنسان.
بصلي وديل التعبان مدلدل من بوقه في مشهد أقل ما يقال عنه إنه مرعب. وضحك ضحكة غريبة وهو بيقول.
"اجمل لحم هو لحم التعابين، بس ده طبعاً بعد لحم البشر ..
حسيت إن الكلام هرب مني ومعرفتش ارد عليه اقوله ايه. ولا حتى قدرت افهم هو بيقصد ايه.
بس اللي قدرت اعمله إني جريت بسرعة ودخلت اوضتي ولزقت في نبيل وهو نايم. كنت مرعوبة ومش قادرة اتكلم وجسمي كله بيترعش من الخوف. حتي نبيل حس بيا وقالي.
"انتي بردانه ولا ايه يابنتي ؟
طبعاً مقدرتش ارد عليه وهو مركزش وكمل في نومه. وانا فضلت مبحلقة في باب الاوضة وخايفة يدخل عليا في اي لحظة. والحمد لله كنت مطمنة شوية لاني جبت مريم تنام وسطينا الأيام دي ولا كنت هبقي مرعوبة يدخل عليها هي..

فضلت صاحبة لحد الصبح. وحسيت بسكون غريب في البيت مفيش اي صوت ولا اي حركة برأ ودي حاجه بقت نادراً لما بتحصل في بيتنا .
قلت ادوس على نفسي واطلع اطمن. دورت في الصالة والمطبخ ملقتوش. دوست علي نفسي اكتر وقربت من اوضته وفتحت الباب بهدوء بس ملقتوش هناك.
استغربت وفرحت في نفس الوقت قولت يمكن مشي وارتحت منه.
لكن أكيد مش بالسرعة دي..
خرجت للجنينة من تاني.
ودورت فيها ملقتوش.
بس لقيت حاجة غريبة لقيت باب القبر مفتوح قربت منه وبصيت جواه.
لقيت ياسر نايم جوا. والغربية إنه مغطي جسمه كله بالتراب. ومفيش غير رقبته بس هي اللي ظاهرة. وكأنه مدفون ، وفي خيالات كتير عماله بتتحرك من حواليه، حسيت إني هيغمي عليا لما شوفت دود بيخرج من بوقه وعينه ، لا هو كده ميت بجد مش عايش. الكابوس خالص خلاص الحمد لله.
دخلت جري صحيت نبيل وحكتله اللي حصل كله قدامي دلوقتي.
وخدته من ايده وفرجته على المشهد الغريب ده. فضل يبكي وينوح علي ابنه اللي ما صدق رجعله من تاني وراح منه مرة تاني..
سبته بيبكي وقربت ناحية باب القبر وقفلته وحطيت عليه القفل من تاني واتنهدت تنهيدة طويلة أوي.
أخيراً خلصت منه.
سندت نبيل علي كتفي ودخلت بيه الاوضة ومرضتش ادخل بيه في حالته دي علي البنت . دخلت اوضه تانيه وفضلت اهديه لحد ما نام.
ونمت انا كمان من كتر التعب خصوصاً إني كنت مطمنة شوية النهاردة غير الايام اللي فاتت.
لكن ده مجرد مسكن برضه أنا مش هرتاح غير لما المسخ اللي مدفون برا ده، يمشي من بيتي خالص، لاني مش هكون مطمنة وهو موجود حتى ولو كان ميت لاني مضمنش إنه ميصحاش مرة تانية.
بعد اكتر من ست ساعات حسيت بنبيل صحي جنبي وسمعت صوته وهو بيبكي.
صحيت وحاولت افهمه إن اللي حصل ده غلط ومينفعش يحصل.
واحنا بنتكلم سمعنا صوت باب بيتقفل جامد.
جرينا نشوف فيه ايه.لقينا باب اوضة مريم مقفول وهي بتعيط بس صوتها مكتوم.نبيل كسر الباب.وكانت المفاجأة والصدمة.ياسر واقف قدامي من تاني لكنه كان عبارة عن هيكل عظمي دلوقتي . ازاي رجع تاني. وازاي فتح باب القبر وانا كنت قفلاه عليه من برا؟
ودلوقتي واقف قدامي و بيحاول يموت مريم.جري نبيل نحيته وشده بعيد عنها وانا روحت اخدتها في حضني.
ونبيل بيقوله .

"انت إزاي عايز تقتل اختك انت مجنون؟
ضحك بصوت عالي .اختي مين انا مليش اخوات ولا انت ابويا ولا الست دي تبقي امي.انا اعلي منكم كلكم انا مخلوق ارقي من بني البشر جميعاً.
حسيت بالرعب من كلامه .ونبيل قرب منه وحط ايده على كتفه .
"لا انت ياسر ابني حبيبي ورجعتلي من تاني بلاش جنان ياحبيبي وارجع ياسر بتاع زمان.
بحركة سريعة أطاح بنبيل علي الارض.قولتلك انا مش ياسر ياغبي انا شيطان دخلت في جسم ابنك بسبب التعويذة الي عملها جعفر الساحر.
لا جعفر شيخ مش ساحر.
ضحك بصوت عالي.وفي ساحر ينتهك حرمة القبر يا غبي؟ وفي ميت بيصحي من تاني . انا اتشبهت بابنك مش اكتر. بس اتشبهت ودخلت جوا جسم ميت ومقدرتش أمنعه من إنه يتحلل . ودي كانت فكرة جعفر الغبي هو كمان.
وانت صدقت ان جعفر ممكن يحييي ابنك من تاني يا غبي. مش قولتلك إن البشر كلهم أغبياء.
رد نبيل عليه. انا مش فاهم حاجه. يعني انت جيت هنا تعمل ايه؟
"انا جيت هنا عشان انفذ السحر الي بيعمله جعفر ومهمتي تبقي اسهل وانا عايش وسطكو وليا بيت وجسم بشري حقير بعيش فيه..
ودي كانت رغبة جعفر مش رغبتي. ولكن بما إنه بيقدر يتحكم فيا فأنا مجبر اعمل اللي بيطلبه وإني افضل عايش في جسم بشري ..
بس زي ما قولتلك الجسم بيتحلل ومش قادر أسيطر على ده. وعشان كده لازم ادخل جسم تاني يكون عايش مش ميت وياسلام لو كان صغير عشان افضل فيه فترة أطول بدل ما كل شوية ادور على جسم تاني أسكنه. وبعدها بص لمريم. ورجع كمل كلامه
وجعفر طلب مني يكون ده سر بنا.
لكن بما أنكم اكتشفتم السر ، مش هينفع اسيبكم تعيشوا تاني. لازم انتوا الاتنين تموتوا..
وفجأة شكله اتحول وبقى مرعب
اتحول لصورة غريبة أوي ابشع من اني اوصفها. مهما احاول مش هقدر اوصلكم الشكل المرعب اللي انا شفته قدامي ده..
.اخدت مريم وحاولت اهرب بيها لكنه مسكني ورماني علي الأرض.
.نبيل ضربه علي رأسه بسيخ حديد.متأثرش لكنه سابني واتجه لنبيل.وانا وقفت على الباب ومعايا مريم.وشوفت بعيني جوزي بيتقع وكأنه حيوان في ايد جزار.
طلعت اجري قولت انفد ببنتي . قبل مااخرج من البيت حصلني. وحاولي يرجعني جوه تاني لكني كنت بقاوم .وسبت مريم وقولتلها تجري بعيد.
فضلت اقاوم فيه.وهو بيشدني لكن قوتي مساعدتنيش وهو اتحكم فيا ودخلني جوه. صرخت بصوت عالي علي مريم بنتي
"اهربي يا مريم . اهربي واوعي ترجعي هنا تاني اهربي من المكان الملعون ده.
ودي كانت آخر كلمات قالتها لي أمي.
وبعدها شوفت الشيطان بيدخلها جوه وكنت سامعه صوت صريخها. كانت بتصرخ بصوت عالي اوي وانا مش قادرة اتحكم في دموعي ولا عقلي قادر يستوعب اللي بيحصل ده. وبعد شوية صوت الصريخ وقف
. وفجاة حسيت بهزة كبيرة بترج البيت كله.
انا مش فاهمة ولا شايفة اللي بيحصل جوا دلوقتي لأمي. لكنه أكيد بياذيها زي ما عمل في بابا.
الهزة زادت اكتر. واكتر وفجاة لقيت البيت كله بيتهز . جريت خرجت برا ولما حسيت إني بعدت . لفيت وشي
.وفجاة البيت بقي يتحرك كأنه فيه زلزال.وبعد دقايق البيت اتحول لكوم تراب . واتساوي بالأرض والقبر كمان اتهد هو كمان والبيت بقى عبارة عن خرابة كبيرة .
فضلت واقفة مكاني بعيط لحد ما الشرطة جت واخدوني لبيت عمتي عشان مليش اي قرايب غيرها ليا.
ومن يومها وانا عايشة عند عمتي.
وكل الناس بتسالني عن اللي حصل في بيتنا. لكني مقدرتش اتكلم ولا احكي لحد اي حاجه. وفضلت كاتمة السر طول عمري في قلبي وشايلة حمله لوحدي..
لكني قررت احكيه دلوقتي لانه خنقني بجد وحاسة إنه هيموتني. انا كل يوم بالليل اول ما بغمض عيني بشوف الشيطان ده قدامي وهو بينادي عليا وبيقولي .
عمرك ما هتهربي مني أمك ماتت وابوكي مات. واخوكي مات لكني مامتش انا مينفعش أموت. وهييجي اليوم اللي اخد روحك ليا واسكن جسمك للابد..
كل ده حصل عشان ابويا مقدرش يقتنع ان ابنه مات ومشى ورا ساحر حقير دمر حياتنا كلنا.وفضلت انا الشاهدة الوحيدة على الكارثة واللعنةالي حصلت في بيتنا ..
تخيل طفلة تشوف وتعيش كل الي انا حكيته ده. وتعيش باقي عمرها يطاردها شيطان رجيم في نومها وصحيانها كمان..
تمت

تعديل المقال