قصة كانت نغم لابسة الفستان الأبيض

وأخيراً اجى اليوم المميز، هو يوم عرس نغم..
(كانت نغم لابسة الفستان الأبيض وفالتة شعرها الأشقر ومكحلة عيونها الخضر كانت كتير حلوة. ومعها رفيقتها وتوءم روحها ميرا كانت لابسة فستان بني على لون عيونها وفالتها شعرها الاسود وهي سمرا).
نغم: شوفي من هون شعري زابط.؟
ميرا: لك كتير زابط والله طالعة تجنني.نغم: برأيك لما يشوفني ماجد شو رح يقول؟ميرا: رح يقول نيالي لان تزوجتك، لك هو رح يتزوج أحلى بنت بالعالم، رح يتزوج رفيقتي وحياتي.
نغم: ههههه، حبيبتي..تعرفي من زمان استنى هاليوم.
ميرا: بعرف صارلكن حب اربع سنين ما يكفي.
نغم: اي والله من لما كنا بالجامعة تتذكري هديك الأيام.
ميرا: يا روحي اليوم عرسك لازم ما نتذكر شي من الماضي ونفكر بالحاضر.
نغم: اي وانتي ايمت رح نشوف يوم عرسك؟
ميرا: مو لحتى لاقي فارس أحلامي بالأول.نغم: اوف كتير متوترة.
ميرا: ليش متوترة بالعكس تفائلي لانك حلوة، لو كان عرسي كان تكبرت وشفت حالي،ليش.. لاني حلوة ورح اخذ انظار الكل والكل رح يحبني واذا حبوني رح يتندموا لان ما تزوجوني واذا تندموا رح...
نغم: ميراااا خلص يكفي سكتي وترتيني بالأكثر.ميرا: ليش شو حكيت؟

•••••••••••••••••••

بالعرس كان الكل يرقص ومبسوط..
(كانت ميرا واقفة وتضحك ويجي كرم يوقف معها هو شب حلو طويل شعرو اسود وعيونو سود واسمر)..
كرم: مرحبا..
ميرا: اووف خوفتني هيك جيت فجأة وهمست بأذني.كرم: ما كنت بعرف انو تخافي فوراً.
ميرا: انا من وين بعرفك؟
كرم: ما بعرف، تذكري..ميرا: اووف هذا يلي ناقصني اتذكر من وين بعرفك، تركني فرحانة بعرس رفيقتي شوف ما احلاها يعني اكيد بدها تكون حلوة لان انا رفيقتها..
كرم: قلتلك مرحبا ما قلتلك حكيلي عن جمالك.ميرا: والله..؟ اذا ما عجبتك بعد عني مين قلك تجي توقف جنبي، اوف ياا ناقصني هيك ناس.
كرم: انتي ما تعرفي تسكتي؟
ميرا: لك اذا مو عاجبك روح مع غيري العرس معبى بنات، اكيد انت من طرف ماجد لك لشو عزمك عالعرس ليش ليعزم واحد متلك..
كرم: انا برأيي ليش نغم رفيقة وحدة متلك، لك شو ملاقية فيكي.ميرا: اروح احسنلي بلا ما ارتكب فيك جريمة هلأ. •••••••••••••••••••••
(راحت ميرا لعند العرسان ماجد ونغم)..
ميرا: لك مبروووك يا عرساان.
ماجد: ع قبالك يا احلى ميرا.
ميرا: ما تصدق شقد فرحانتلكن لدرجة رح ابكي من الفرحة.
نغم: ميراا عالأقل بس بهاليوم لا تبكي.
ميرا: تمام..تمام هلأ ما رح ابكي بس لما ارجع عالبيت رح ابكي.ماجد: هلأ ما فهمت يا حياتي ليش بدك تبكي؟
ميرا: لانو اخذت رفيقتي منيماجد: يالله ياربي عنجد انتي مجنونة.نغم: ههههه يا عيوني خلص هلأ تبكي اكتر.(ظلوا كل العرس الكل فرحان ويرقص وكان احلى عرس). •••••••••••••••••••••
بعد اسبوعين من العرس...
(راحت ميرا لبيت ماجد ونغم..)
نغم: والله فرحتيني لما اجيتي كنت مفكرة بس اتزوج رح تنسيني.
ميرا: مين..؟ انا..؟ هههه شو شايفتني مو وفية لدرجة انو انساكي.نغم: لا يا حبيبتي بس تعرفي انا هلأ صارت حياتي مختلفة عن حياتك.
ميرا: اي لا تخافي عن قريب رح تصير حياتي متلك حياتك.
نغم: كيف يعني..؟
ميرا: يا ستي من يومين حلمت انو عم اشتغل نادلة بمطعمكن يعني مطعم ماجد.
نغم: انتيي؟ البنت يلي اذا بدها كاسة مي ما بتقوم تجيب لحالها حلمتي انك تشتغلي نادلة.
ميرا: اييي.. المهم، وبمطعمكن لقيت روحي وحياتي وفارس احلامي.نغم: ومين هو..؟
ميرا: ما شفت شكلو بس شفتو من بعيد كان يقللي بحبك وحتى ما سمعت صوتو بس حسيتو يقلي بحبك.نغم: انا بظن انو ما حلمتي بس ألفتي سيناريو حلم من مخيلتك.
ميرا: عم تجرحيني هااا.. يعني بالوقت يلي رح لاقي حب حياتي انتي بدك تمنعيني،والله هيك حلمت.
(فات ماجد عالغرفة وسمع ميرا)..
ماجد: من شو بدها تمنعك؟
ميرا: هي مرتك بدها تمنعني من فارس احلامي، من فرحي وسعادتي وحب حياتي، من الشخص يلي رح كمل عمري معو، اخخخ شو مشتهية شوفو.نغم: الانسة خيالها واسع.
ماجد: يا ميرا طريق حياتك مفتوح روحي لاقي محدا مانعك.
ميرا: معناتها رح تشغلني بالمطعم عندك، حتى مابدي اجرة المهم لاقيه.
ماجد: والله رح تخلي الزباين كلهن يهربوا من المطعم.
ميرا(عملت حالها تبكي): الحق مو عليك انت وياها الحق علي يلي اجيت اطلب منكن شوفيها لو ساعدتوني ودعمتوني يعني يهون عليكن هيك ظل كل حياتي بدون واحد يحبني و...
ماجد(يصرخ): تماااام تمام يكفي اذا بدك اعطيكي ادارة المطعم كلها بس سكتي.
ميرا: يا صهري يا عيوني مابدي الإدارة بدي بس اكون نادلة واوعدك ما رح اعمل شي غلط.
ماجد: تمام من بكرا تجي تبلشي شغل بالمطعم ورح يكون هنيك ابن عمي لان انا هالفترة مشغول هو يلي يدير الشغل بالمطعم.
ميرا: لك احلى ماجد والله، قلتلك يا نغم ماجد مافي منو قلتلك بس تتزوجيه ما رح تندمي.
نغم: ههههه تمام ميرا بس شوي شوي لا تستعجلي بالحكي.
ميرا: ههههه من الحماس معد اقدر اسكت.ماجد: ميرا ليش انتي ايمت قدرتي تسكتي.
ميرا: والله يا صهري مارح ازعل منك شو ما حكيت هالمرة لاني فرحانة ومابدي حدا يخرب فرحتي مشان ما يروح حماسي لان لازم بكرا جهز حالي وروح...
ماجد: انا هربان.نغم: الله معك.

•••••••••••••••••••••••

بالليل ببيت اهل ميرا...

(كانت ميرا عم تحكي مع اخوها مصطفى عن موضوع شغلها بالمطعم).

ميرا: اي وهيك يعني يا اخي شو رأيك؟

مصطفى: لا مافي شغل مادام انا اشتغل لشو انتي تشتغلي.

ميرا: يا اخي يا حبيبي يا نور عيوني بس هالمرة لا توقف بطريقي يعني كل رفقاتي تزوجوا خليني لاقي نصيبي انا كمان.

مصطفى: تركتي كل الدنيا وبدك تلاقي نصيبك بهالمطعم؟

ميرا: اي هيك الحلم قلي.

مصطفى: عنجد انتي غبية لك كيف تصدقي حلم؟

ميرا: هالمرة قررت صدق حلمي وامشي ورا احساسي، لاني رح انجح وافرح ولاقي سعيد الحظ يلي يتزوجني ونعيش سوا و...

مصطفى: لك تعرفي ليش ما لقيتيه لهلأ.

ميرا: ليش؟

مصطفى: لان محدا عم يتحمل حكيك الكتير.

ميرا: اي وانا بدي لاقي يلي يتحمل حكيي الكتير متل ما بقولوا خليك متل الشوكة لتشوف مين رح يتحملك اكتر ويتمسك فيك.

مصطفى: مين قال هالمتل؟

ميرا: انااا

مصطفى: رح وافق على شغلك بس لحتى اخلص من نقك.

ميرا: لك يسلملي اخي احلى اخ بالعالم لك انت الاساس الله لا يحرمني منك وان شاء الله انت كمان تلاقي نصيبك وتفرح وتفرحني....

مصطفى: ايي يكفي بعدين كملي حكي وادعية، المهم لازم ابي وامي ما يعرفوا بلا ما يعصبوا علينا.

ميرا: تمام بوعدك مارح يعرفوا.

•••••••••••••••••••••

ثاني يوم الصبح..

(نزل كرم من شقتو لعند ماجد ونغم)..

كرم: صباح الخير، ما اجى مني اعمل فطور وقلت اجي افطر عندكن.

نغم: اي اهلا وسهلا.

ماجد: صحيح في بنت اليوم رح تجي تشتغل بالمطعم نادلة.

كرم: بس ما يلزمنا نادلين المطعم مكتفي.

ماجد: معليش خليها تشتغل لدرجة اذا بدك خلي شي نادلة غيرها تبطل شغل وشغلها هي بدالها مو ناقصني تجي تبهدلني.

نغم: شو خايف من حكيها؟

ماجد: لك والله بحبها وبحب حكيها بس لما تحكي كتير و بسرعة بحس حالي اختنق بدالها.

كرم: خلص ولا يهمك بس تجي بخليها تبلش شغل، يلا هي اكلت شوي انا رايح.

نغم: لك ستنى عدل قميصك من هون.

كرم: يا مرت اخي انتي تظلي مهتمة بالترتيب والاناقة.

نغم: طبعا لان اول بنت رح تحبك رح تطلع على اناقتك نحنا هيك البنات تهمنا اول شي الاناقة.

ماجد: شايف مرتي شقد مرتبة

كرم: شايف.. الله يبعتلي وحدة متلها، يلا سلام.

•••••••••••••••••••••

(فاتت ميرا عالمطعم بكامل اناقتها ومكياجها)..

ميرا: لو سمحتي وين فيني قابل مدير المطعم؟

هبة: كيف فيني ساعدك؟

ميرا: انتي نادلة هون صح؟

هبة: اي والله.

ميرا: ياااي رح نصير زملاء بالشغل.

هبة: ما فهمت..؟

ميرا: يعني انا كمان هون جاية اشتغل نادلة، قوليلي وين المدير؟

هبة: اي خليكي هون وهلأ رح يجيكي.

(راحت هبة لعند كرم ونادتو).

هبة: استاذ كرم هديك البنت بدها ياك قالت انو هي نادلة الجديدة.

كرم: تمام رح روح شوفها.

(راح كرم لعند ميرا..)

كرم: انتي النادلة الجديدة؟

ميرا: اي.. هذا انت؟؟ شو جابك لهون اوووف ما خلصت منك بالعرس كمان جاي لهون شوف صح انا نادلة جديدة بس ما رح اتعامل مع زبون متلك لانو صراحة ما طقتك من لما شفتك بالعرس وما بعرف وين شفتك كمان...

كرم: يا انسة طولي بالك خذي نفس.

ميرا: شو قصدك؟ شو شايفني احكي كتير لحتى هيك تقلي، يا اخي تركني بحالي انا مو جاية لقابلك جاية لقابل المدير.

هبة: ياا انسة قدامك المدير بذاتو.

ميرا: وينو مو شايفتو..؟

كرم: احم.. انا المدير هون.

ميرا: شوووو؟ انتتت؟ عنجد ما بصدق، مو معقول يعني لهالدرجة وليش من الاول ما قلتلي.؟

كرم: ليش انتي عطيتيني مجال اني احكي.

ميرا: شوف عم تغلط كتير بحقي هاا.

كرم: انتي رفيقة ماجد ونغم صح؟

ميرا: اي.. قلي ماجد انو المدير هون ابن عمو.. لك يعني انت ابن عمو؟

كرم: اي انا ابن عمو وانا المدير هون وبالشغل رح اتعامل معك متل البقية بدون تمييز.

ميرا: ومين طلب منك تمييز يا حضرة المدير.

كرم: تمام.. اول شي هذا الشعر تضبيه، تاني شي هذا المكياج تخففيه، ثالث شي ما تجيني بهذا اللبس من يوم ورايح، رابع شي..

ميرا: اووف اووف طول بالك شو انا جاية اشتغل بمطعم مو ببيتك حتى تتحكم بلبسي ومكياجي بعدين اذا ما لبست هيك كيف رح لاقي فارس احلامي و...

كرم(بصوت عالي): رابع شي الحكي الكتير بلااااه. اوووف

ميرا(عملت حالها تبكي): اي تمام ليش عصبت يعني ماكان قصدي شي انا.. انا كتير بتحسس وفورا ابكي من الصوت العالي يعني انا مسكينة شوف البراءة بعيوني..

كرم: هبة مشان الله خذيها.

هبة: تمام

••••••••••••••••••••••••

(كرم دق على ماجد وحاكاه..)

كرم: لك يا زلمة شو هالبنت يلي باعثلي ياها تشتغل عندي.

ماجد: مين؟ ميرا.. ههههههه

كرم: لك من اجت ما سكتت.. صرعتني.

ماجد: ههههه بس بنت طيبة هاا.

كرم: لك لشو جاية تشتغل هون؟

ماجد: ههههه بدها تلاقي فارس احلامها.

كرم: وما رح تلاقيه إلا بمطعمنا

ماجد: ههههه..المهم دير بالك عليها هي غالية علينا.

كرم: اي تمام أمري لالله.

••••••••••••••••••••

^ قصة فكاهية ^

بكتابة..: # القلب الازرق..

*آمنتُ بحلمي فوجدتُكَ* {2}

-----------------------------------------

بالمطعم كان اليوم اول يوم بالشغل لميرا..

(كانت ميرا شايلة العصير لحتى توديه للزباين، ولما لتفتت صطدمت بكرم وسقط العصير من ايدها)..

ميرا: لك شو انت ما تشوف..؟

كرم: انتي يلي ما تشوفي منيح.

ميرا: انا..؟ لك انت يلي اجيت وصطدمت فيي، وخليت العصير يوقع من ايدي وبسببك انا رح افشل بشغلي من اول يوم.

كرم: هيك بتحكي مع مديرك؟

ميرا: ايي..اسفة كتير نسيت انك المدير بس يعني بنفس الوقت انت يلي غلطت وخليت العصير يوقع من ايدي.

كرم: اي تمام جيبي مسحي الارض وهبة خليها تودي للزباين عصير بدالو.

ميرا: مين؟ انا..؟ امسح الأرض؟ والله شو شايفني خدامتك ولا شو؟ مين انت لتقلي مسحي الأرض، بعدين بسببك هيك صار يعني انت يلي لازم تمسح الأرض.

كرم: انا امسح الأرض؟ اي حقك انسة ميرا.

ميرا: اي طبعاً حقي لان انا ما احكي إلا الصح.

كرم: بلا حكي فاضيلا تنسي رح تشتغلي متل الكل وإلا أطردك، يلا جيبي مسحي يلي كبيتيه.

ميرا: تمام.. يعني.. ليش عصبت شو حكيت شي يعصبك

كرم: يالله شو هالمصيبة يلي بعثتلي ياها.

••••••••••••••••••••••

(كانت ميرا عم تمسح الأرض)..

ميرا(تحكي مع حالها): اي طبعاً هو المدير يروح يقعد ويخليني انا يلي اشتغل وامسح الأرض لا وكمان هو السبب انو كبيت العصير ويحط السبب فيي لا وكمان بدو يطردني ويحرمني من نصيبي وفارس احلامي.

هبة: ميرا عم تحاكيني؟

ميرا: لا عم احكي مع حالي، هذا مديرك رح يخليني جن وصير احكي مع حالي وصير مجنونة.

هبة: هههه ما فهمت شو فيكي.

ميرا: اي بس معليش انا بقلك انو رح اصبر بس كرمال حبي يلي رح لاقيه.

هبة: ليش وين رح تلاقي حبك؟

ميرا: هون بالمطعم، شوفي هداك الشب يلي قاعد عالطاولة يلي عاليمين كتير حلو.. لك ليكون هو نصيبي؟

هبة: ههههه لك قاعدة معو بنت اكيد بتكون خطيبتو ليش ليكون نصيبك

ميرا: لا مبين انو هي اختو، رايحة جرب حظي.

(راحت ميرا لعند الشب والبنت يلي كانوا قاعدين)..

ميرا: اهلا وسهلا، شو بتحبوا تاكلوا؟

الشب: بدنا نشرب شي بعدين ناكل.

ميرا: ليش؟ انا بحب اكل وبعدين اشرب وانت لازم تكون متلي.

الشب: وانا شو خصني فيكي؟

ميرا: مو انت رح تكون نصيبي وفارس احلامي اكيد رح تكون بيناتنا نقاط مشتركة يعني لازم تكون صفاتك متلي.

البنت(تصرخ):شوو؟ لك انت عم تخوني

الشب: لا لك هي مبين مجنونة لا تصدقيها والله حتى ما بعرفها.

ميرا: يعني مو انت يلي جيتني بالحلم؟

الشب(يصرخ): لك اي حلم عم تحكي، شو هذا المطعم مافيه مدير يجي يقلع هالبنت من فوق راسي.

(اجى كرم وهو معصب)..

كرم: شو في شو صاير؟

الشب: شو هالخدمة يلي عندكن شو هالمطعم شو انتو مجانين.

ميرا: قبل ما توجهلنا حكي شوف حالك انت وهي يلي جنبك بعدين نحنا مو خدامين عندك حتى تطلب خدمة منيحة ولا ترفع صوتك بوجهي مشان ما تندم كتير و...

كرم: ميراااا يكفييي ولحقيني.

•••••••••••••••••••••••

راحوا ميرا وكرم على مكتب المدير..

كرم: لك شو عملتي شوو؟ من اول يون خليتي الزباين يروحوا.

ميرا: انا مو قصدي.. انا بس..

كرم: يكفيي، مابدي اسمع ولا كلمة، شوفي انتي مو خرج انو تشتغلي نادلة تركي الشغل.

ميرا: لا الله يخليك مستحيل، شغلي هون كتير مهم ما بقدر يعني شغلي هون رح ينقذ حياتي.

كرم: بس ما عم تعرفي تشتغلي منيح.

ميرا: بوعدك ماعاد اعمل شي غلط المهم لا تطردني.. بعدين اذا طردتني رح اشكيك لماجد وهو بيعرف يتصرف معك لان ماجد يحبني وما بيعطي علي لاني رفيقتو ورفيقة مرتو و..

كرم: تمااام يكفي، خذي نفس.

ميرا: يعني ما رح تطردني

كرم: بعطيكي اخر فرصة بس.

•••••••••••••••••••••

بالليل بعد ما خلصت ميرا شغل راحت لبيت نغم..

ميرا: اي والله وهيك كان اول يوم إلي بالشغل كتير تعب.

نغم: بس كرم شكى منك كتير.

ميرا: والله؟ انا يلي بشكي منو لك راد يطرني لك كان بدو يقطع نصيبي ويخرب حياتي.

•••••••••••••••••••••••

بنفس الوقت كان ماجد وكرم قاعدين بشقة كرم فوق بيت ماجد ونغم..

كرم: اي والله وهي احكيلك، لك جننتني بحياتي ما عصبت بالشغل متل اليوم.

ماجد: هلأ هي طبيعتها مدلعة ومو معودة عالشغل بس خلص تركها تتعلم.

كرم: شو يعني تجي تتعلم عندي، لك من اول يوم طردتلي الزباين وفوق هيك طالعت الحق علي ولما احكي معها فورا تبكي وعالاساس حساسة.

ماجد: كأنك صرت متلها تحكي كتير

كرم: لك لا تشبهني بحكيها يا زلمة، تحكي كتير كتير وبدون ما تاخذ نفس وبسرعة.

••••••••••••••••••

ثاني يوم بالمطعم..

(اجى مصطفى عالمطعم)..

هبة: تفظل كيف فيني ساعدك.؟

(لما مصطفى شاف هبة فورا عجبتو)..

مصطفى: وانا بقول ليش المطعم مشهور، طلع بسببك انتي الحلوة وتشتغلي فيه.

هبة(بدلع): هذا من زوقك

مصطفى: اي يسلملي دلعك انا.

هبة:

كرم: هبة شو عم تعملي يلا لحقي عالزباين.

مصطفى: يا عيني واسمك هبة كمان شو حلو متلك.

كرم: يا استاذ تفضل

مصطفى: ايي.. كنت عم دور على بنت اسمها ميرا بتشتغل هون.

كرم: ومين حضرتك شو بتقربلها؟

(وفجأة بتجي ميرا..)

ميرا: مصطفى(وباستو).

مصطفى: وين كنتي مو عالاساس تشتغلي هون؟

ميرا: اي بس مريت على نغم قبل ما اجي، تعال لاشربك فنجان قهوة من ايدي.

(راحوا ميرا ومصطفى وظلوا كرم وهبة واقفين وصافنين)..

هبة: كان يتغزل فيي خلاني حبو وطلع عندو حبيبة وهي ميرا

كرم: وهي عالأساس تدور على فارس احلامها هون وطلعت عم تكذب علينا

(حطوا عينهم بعيون بعض كرم وهبة وهزوا براسهم وراحوا قعدوا عند ميرا ومصطفى)..

ميرا: صحيح ما عرفتكن على بعض.

كرم: لا والله عرفينا لنشوف.

ميرا: هذا اخي مصطفى، مصطفى هي هبة وهذا كرم ابن عمو لماجد.

كرم وهبة: اخوكي..؟

ميرا: اي لكن شو فكرتوا؟

هبة: والله انا فكرتو حبيبك.

كرم: وانا فكرتو فارس احلامك.

ميرا: شوو..؟ لو عنجد حبيبي وفارس احلامي ما كان تعذبت بالشغل هون، بعدين لا تقهروني لانو لسا ما لقيتو.

كرم: اي تمام وهلأ تركي اخوكي وقومي شوفي شغلك بلكي تلاقيه.

ميرا: اي والله ليش لساتني قاعدة لهلأ لازم قوم بلكي لاقيه انا حاسة حالي رح لاقيه عن قريب ويقلي بحبك ونعمل عرس ونعيش بسعادة لك تخيلوو..

كرم: ميراا اول شي خذي نفس ثاني شي يلا قومي.

مصطفى: خلي هبة قاعدة معي شوي حابب اتعرف عليها.

هبة: انا رح ظل قاعدة معك

مصطفى: يا عيوني..

كرم: لا إله إلا الله شو هالمصايب هدول.

•••••••••••••••••••••

مر أسبوع على هالحالة.. كانوا ميرا وكرم يظلوا خناق..

(لما كانت ميرا بالشغل دقتلها نغم..)

ميرا: عيوني وتوءم روحي كيفك.

نغم: الحمدلله يا روحي، دقيتلك لحتى خبرك انو اهلك اجوا من السفر وسألوني عنك وقلتلهن انو انتي بمطعمنا.

ميرا: شووو لك شوو عملتي خربتيلي حياتي ومستقبلي واحلامي

نغم: لك ليش شو عملت؟

ميرا: اذا عرفوا امي وابي اني عم اشتغل رح يبهدلوني لك يالله ضاع فارس احلااامي.

نغم: بلا فارس احلامك هلأ سكري التيلفون وروحي طلعي من المطعم قبل ما يجوا.

كرم: شوفي؟

ميرا: لازم اهرب لازم اطلع من المطعم من وين الباب كان من اليمين..لا من اليسار ...لك يالله داخ راسي شو اعمل

كرم: ميرا الباب قدامك هدي شو صرلك.

ميرا: تمام انا طالعةة

(لما كانت ميرا طالعة من المطعم وصلوا اهلها..)

ام ميرا: بنتي شتقتلللك

ميرا: ههه.. اي يا امي وانا كمان.

ابو ميرا: يابنتي شو تعملي هون.

كرم: اهلا وسهلا.

ابو ميرا: ومين هذا؟

كرم: انا مدير ميرا...

ميرا: اي هههه.. لا يعني قصدوا مدير حياتي لانو..

ام ميرا: لانو..؟

ميرا: لانو.. هذا حبيبي وقال بس يجوا اهلك رح اخطبك واطلبك بالحلال.

كرم: شو..

ابو ميرا: اهلا وسهلا فيك يا ابني بنتشرف.

كرم:...

ميرا: اي يلا انتو روحوا عالبيت وانا بعد شوي بلحقكن.

••••••••••••••••••••

بعد ما راحوا اهل ميرا..

كرم: انتي شو عملتي لك بموتك واخلص.

ميرا: والله مو ذنبي يعني من دون قصدي ما كنت مفكرة انو رح احكي هيك و...

كرم: اوووف يكفي خلاص قوليلهن انو انا وانتي ما تفقنا وخلص.

ميرا: اي رح قلهم انو انت ما حبيتني وانو حبيت غيري والاحسن انو نترك بعض ومن هالكذب.

كرم: هوايتك الكذب يعني؟

ميرا: مين..؟ انا؟ بحياتي ما كذبت انا اكتر انسانة صادقة بهالحياة.

كرم: ويلي عملتي من شوي شو هو مو كذب؟

ميرا: لا هذا بيتسمى انقاذ النفس يعني انا انقذت نفسي من اهلي ما عملت شي ثاني، على كل حال انا رايحة هلأ عالبيت لشوف شو رح يصير.

كرم: رح تتركي الشغل؟

ميرا: لا رح ظل اجي عالشغل واهلي بقلهم انو رايحة عالنغم بس انا ما بروح عليها بجي عالشغل.

كرم: وهذا مو اسمو كذب؟

ميرا: لا هذا اسمو انقاذ المستقبل يعني انا بدي انقذ مستقبلي بفارس احلامي يعني لازم اجي عالشغل.

كرم: وشو مشان قصة الخطبة يلي خترعتيها؟

ميرا: رح قول لاهلي انو معد تحبني وما رح تخطبني وانو تركنا بعض

كرم: وهذا مو كذب كمان ولا انقاذ شو؟

ميرا: هذا اسمو انقاذ الاخر يعني انا انقذتك من هالمصيبة، شوف بعجبك انا يعني كتير صادقة وبحياتي ما كذبت وهلأ انا رايحة يلا باي.

كرم: والله هالبنت بلشت تعجبني بعقلها

•••••••••••••••••••••••

المسا ببيت اهل ميرا..

(بعد ما حكتلهم ميرا كلشي عن كرم)..

ابو ميرا: اي وايمت رح يجي يخطبك؟

ميرا: مين؟

ام ميرا: مين يعني، اكيد كرم.

ميرا(عملت حالها تبكي): هااا.. اي معد يجي يخطبني يا امي خاني وراح حب وحدة ثانية

ابو ميرا: شووو

ميرا: اي بس يلا خليهن يتهنوا ما يهمني بكرا يجي غيرو واحسن منو يخطبني.

ام ميرا: لا لا هالقصة ما بينسكتلها.

ابو ميرا: معك حق امشي لنروح نهاجمو ونعلمو كيف يحترم بنتنا وما يجرحها.

ميرا: لا لا شو يعني ما بيصير بعدين بلا ما نزعج نغم هي تظل رفيقتي حرام.

ابو ميرا: لازم نروح بدون اعتراض

(يجي مصطفى)..

مصطفى: شو عم يصير؟

ميرا: يا اخي يا روحي يا احلى اخ بين الاخوة ساعدني ابي رح يروح يبهدل كرم لازم تمنعو وإلا رح هو يبهدلني ويمنعني من الشغل ويقطعني من نصيبي.

مصطفى: احسن مو قاعدة تسمعيني هالموشح امشي خلينا نلحقو.

(وراحوا لعند بيت كرم)..

••••••••••••••••••••••••••

^ قصة فكاهية ^

بكتابة..: #القلب الازرق..

*آمنتُ بحلمي فوجدتُكَ* {3}

-----------------------------------------

راحوا ابو ميرا وام ميرا لعند بيت كرم، حاولوا ميرا ومصطفى يمنعوهن بس ما قدروا..

نغم: ميرا؟ خالتو وعمو ومصطفى شو هالمفاجأة.

ام ميرا: والله يابنتي ما جينا لنقعد.

ابو ميرا: وينو هداك يلي كذب على بنتي وينو..

ميرا: اي هههه يا بابا شفت مبين مو هون يلا خلينا نروح.

ابو ميرا: مو رايح من هون لحتى خليه يعرف قيمتو.

(يجوا ماجد وكرم)..

ماجد: اهلا وسهلا .

ميرا: والله ابي وامي ما اجوا لا اهلا وسهلا.

كرم: ليش شو صاير؟

ابو ميرا: هذا انت يا خاين يا كذاب خنت بنتي وجرحتها شو مفكر رح نسكتلك

كرم: بس انا ما خنتها ولشو بدي خونها

ميرا: صح يا بابا ما خاني يلا خلينا نروح من هون.

ام ميرا: كيف ما خانك، مو تركك ومارح يجي يخطبك وكذب عليكي؟

ميرا(عملت حالها تبكي): هااا.. اي اي صح يعني خاني وكذب علي اخ يا اميبس شو بدي اعمل تعرفي بنتك ما إلها حظ بس يلا إلي الله..

ابو ميرا: انا ما بسمح لحدا يكذب ويستهين ببنتي رح تدفع الثمن.

ماجد: يا عمو خلص طول بالك رح نحل هالمشكلة بس مو بالصراخ.

نغم: اي يلا تفضلوا فوتو وخلونا نحكي ونحنا قاعدين.

كرم(بخوف): اي وانا.. رايح عن ازنكن.

ابو ميرا: مافي روحة.. مافي روحة قبل ما ادفعك الثمن.

مصطفى: ههههه بابا يلا خلينا نروح مشان احكيلكن على كنتكن الجديدة يلي رح اتزوجها.

ام ميرا: هيك يكون الزلمة متل ابني يحب بنت ويتزوجها مو يكذب عليها.

ميرا: اي يا امي شو اعمل بنتك ما إلها حظ يلا خلينا نروح.

(راحوا ميرا واهلها عالبيتهن)..

كرم: والله العظيم كلهن مجانين كنت مفكر بس ميرا مجنونة طلعوا حتى اهلها.

نغم: انا معد اقدر امسك حالي عن الضحك.

كرم: لشو تضحكي

ماجد: هههههه والله وانا كمان هي ميرا مبين رح تفوتك بمشاكل كتيرة.

كرم: ماجد الله يخليك خليها تبطل شغل من عندي

ماجد: عذرني ما اقدر

كرم: طيب تعال انت صير مدير المطعم وانا رح اطلع منو.

نغم: هههههه لهالدرجة خايف منها

كرم: لك والله هي مصيبة يالله

••••••••••••••••••••••

لما رجعوا عالبيت اهل ميرا..

ام ميرا: اي يا ابني مين رح تصير كنتنا؟

مصطفى: بنت كتير حلوة بكرا رح عرفكن عليها.

ام ميرا: واخيرا قررت تتزوج واشوف ولادك.

ميرا: اي امي وعقبال ما تشوفي ولادي

ابو ميرا: شايفك مو مزعوجة لان هداك الكذاب خانك؟

ميرا(عملت حالها تبكي): اخخ يا بابا عالقد ما بكيت ما ظل بعيوني دموع تعرف كتير مجروحة لدرجة ماظل فيني احساس وكتير هيك..هيك قلبي يوجعني..

مصطفى: خلااص يكفي تحكي

ام ميرا: تركها تحكي يلي جواتها حرام.

ميرا: اي والله يا امي شفتي بنتك ما إلها نصيب لا وكمان اخي ماعندو احساس وما يخليني ابكي واحكي وفضفض يلي جواتي على كل حال بروح ابكي بغرفتي احسن شي يلا تصبحوا عالخير.

مصطفى(بهمس): اذا لقيت وحدة متلك كذابة وتحكي كتير انا بقص ايدي.

ابو ميرا: شو قلت ابني؟

مصطفى: لا لا ولا شي مزعوج على حال اختي.

••••••••••••••••••••••

ثاني يوم راحت ميرا عالشغل..

(بالمطعم لما شافها كرم هي حاولت تتخبى منو)..

كرم: ميرا تعي لهون خلينا نحكي

ميرا: اييي رايحة شوف الزباين لازم لحق على شغلي.

كرم: لك عم قلك تعي لا تهربي.

ميرا: كأنو لازم امسح الارض ولا شو اعمل، اسفة يا مدير ما عندي وقت انو نحكي لان انا عم اشتغل متل كل النادلين يلي هون.

كرم: مسكتك ما رح تقدري تهربي وهلأ بدك تجاوبيني.

ميرا(عملت حالها تبكي): ليش هيك معصب علي والله مو ذنبي يعني هيك صار فجأة ما كنت بعرف انو رح توصل الشغلة لهالمرحة عنجد انا..

كرم: يكفيي، خذي نفس بالأول، واول شي جاوبيني كيف قدرتي تجي عالشغل.

ميرا: سهلة..قلتلهن رايحة لعند نغم.

كرم: ايوا، طيب شو مشان كذبة مبارح؟

ميرا: انا ما كذبت انا بحياتي ما كذبت انا اصدق وحدة بالدنيا مستحيل كذب و...

كرم: اوووف خلاص المهم شوفي انسب شي انو تتركي الشغل وترجعي على حياتك الطبيعية تمام.

ميرا: شووو مستحيل اترك الشغل فهموا علي انا هون رح لاقي مستقبلي شوف يمكن كل مرة عنجد ما ابكي بس هالمرة والله بدي ابكي

كرم: ميراا يكفي هالحركات بقى انتي بنت كبيرة لشو حتى تصدقي حلم؟

ميرا: بس هذا حلمي انا حاسستو رح ينقذ حياتي..

كرم: لا تصدقي بهيك احلام، اذا ظليتي هون رح تصير مشاكل اكتر ونجرح بعض اكتر مشان هيك الانسب إلنا انو تتركي الشغل.

ميرا: اي تمام.. اسفة لان جبتلك مشاكل، رح اترك الشغل وترتاح مني.

(طلعت ميرا من المطعم بخيبة امل وراحت وحس كرم انو غلط بحقها).

•••••••••••••••••••••••

بالليل ببيت ماجد ونغم.. كان موجود كرم كمان..

ماجد: يعني عنجد تركت الشغل؟

كرم: اي نصحتها وهي سمعت نصيحتي وراحت.

نغم: يا روحي هلأ تكون كتير مزعوجة ميرا كتير حساسة كان عندها أمل انو تلاقي الشب يلي تحبو.

كرم(حس بالذنب): اي يعني.. عادي مو شرط تلاقيه بمطعمنا.

••••••••••••••••••••••

ثاني يوم بالمطعم...

كرم: هبة اجت ميرا شي؟

هبة: لا ميرا تركت الشغل ليش نسيت.

كرم: هاا.. لا ما نسيت.

هبة: بس عم التقي بمصطفى وقلي انو رح يعرفني على اهلو

كرم: حلوو يعني رح يخطبك؟

هبة: يعني هيك شي.

••••••••••••••••••••••••

بالبيت عند نغم كانت موجودة ميرا وتبكي..

نغم: ميرا حبيبتي يكفي وانتي تبكي

ميرا: خلص انا حياتي نتهت وضاعت احلامي، انا ماعندي حظ اساساً ليش لحتى احلم.

نغم: يعني كمان انتي غلطانة مجرد حلم صغير تتأملي بسببو.

ميرا: شوفي اخي لقى البنت يلي رح يتزوجها بالمطعم وانا ما لقيت حدا شوفي كيف حظي اساسا ليش لاحلم.

نغم: يا حبيبتي طولي بالك.

ميرا: واساسا كان كرم مسليني كان يطالعني من جو الاكتآب يعني صح كان يبهدلني كتير بس هيك كلمة خذي نفس دائما كان يقلي ياها ههه كانت تضحكني

نغم: كرم؟ كان يضحكك؟ يعني شتقتيلو من اول يوم بطلتي شغل.

ميرا: هههه لا يعني اكيد ما شتقتلو بس يعني خناقاتنا كانت حلوة.

نغم: ايوااا

••••••••••••••••••••••••

بالليل كان كرم يحكي هو ونغم..

كرم: اي والله ما اجت اليوم عالشغل كنت مفكر انو ما رح تستسلم.

نغم: هي حساسة يعني عندها كبرياء.

كرم: حسيت اليوم المطعم هادي لان مافي صوتها، كل مرة كانت تحكي كتير وبسرعة هيك يعني حلو حكيها.

نغم: شو شتقتلها من اول يوم تركت الشغل؟

كرم: لا اكيد ما اشتاقلها بس يعني انو يمكن اشتاق لطريقة حكيها هيك بس.

نغم: ايوااا

••••••••••••••••••••••••

مر اسبوعين وميرا تاركة الشغل وما عم تلتقي هي وكرم..

(كرم حس حالو عم يفتقدها ويشتاقلها وهي كمان نفس الشي عم تشتاقلو)..

(كانت ميرا طالعة من بيت نغم وكرم نازل من شقتو ولتقوا)..

كرم: ميرا...؟

ميرا: كرم...؟

كرم: ليش ما عم شوفك لما تجي لعند نغم؟

ميرا: ما عم اجي كتير.

كرم: ليش؟

ميرا: لاا بس هيك مابدي اطلع من البيت ما يجي مني.

كرم: انا اسف لانو جرحتك وخاب املك بالمطعم ويعني حلمك..

ميرا: عادي اساسا نسيت يعني هيك مافي نصيب.

كرم: شتقت لما تحكي بسرعة وكتير.

ميرا: وانا شتقت انو تقلي خذي نفس.

كرم: ايي خلينا نروح سوا يعني اذا كان بدك.

ميرا: تمام ما عندي مشكلة.

••••••••••••••••••••••••

كانوا عم يمشوا مع بعض ميرا وكرم عالبحر لحتى وقفوا..

كرم: تعرفي كل يوم استناكي وانا بالمطعم على امل انو ترجعي.

ميرا: انا سمعت حكيك انو يمكن عنجد ماكان لازم صدق حلمي.

كرم: برأيي انو اذا صدقتي رح تلاقي فارس احلامك.

ميرا: يعنيي..؟

كرم: عم حس الايام يلي تمضي بدونك ما اعرف كيف يعني كل لحظة عم فكر فيكي..

ميرا: يعني انت فارس احلامي؟

كرم: يمكن..

ميرا(بفرح): لك اييي قلتلك انو رح لاقي فارس احلامي بالمطعم ولقيتك كنت انت كل الوقت قدامي وما كنت بعرف انو انت رح تكون نصيبي منيح انو صدقت حلمي مشان لاقيك لك عنجد انا بحبك ونحنا لابقين لبعض و...

كرم:

ميرا: ليش هالمرة ما قلتلي يكفي حكي؟

كرم: لانو بحب حكيك وما بمل منو

ميرا: عنجد تحبني يعني انت يلي كنت موجود بحلمي

كرم: يعني مبين انو كنت انا

ميرا: بحبك يا فارس احلامي

كرم: وانا بحبك يا مصيبتي

(مسكوا ايد بعض وكملوا مشي)

•••••••••••••••••••••••

النهاية••

تعديل المقال