قصة وعبرة وعند الله تجتمع الخصوم 

في عام 2017 ...كنت مرافق لخالي المحجوز في معهد الأورام في القاهرة وكان عنده سرطان الدم و كان بيتعالج هناك ... 
و كان فيه في الحجرة أربع سراير بينهم فواصل عبارة عن ستائر 
المهم كان جنبنا سرير كدا فيه واحد صعيدي مريض سرطان الرئة......الراجل دا باليل ما كناش بنعرف نغفل لحظة من بكاه 
و كل ما ينام شوية يقوم من النوم يصرخ مفزوع ...
أنا كل دا طبعاً عارف إن دا من الكيماوي و الألم بتاعه 
لحد ما قام مفزوع في ليلة و دخلت من الستارة أطمن عليه و أجبله حاجة دافئة يشربها و قعدت أطمن فيه و أقوله معلش ألم الكيماوي صعب بس دا إختبار من ربنا و قريب هتخف و كدا يعني .....
فالراجل ضحكلي ضحكة غريبة كدا. ....و قالي ألم الكيماوي
هو إنت فاكرني يا إبني بعيط من ألم الكيماوي 
الألم اللي جوايا يا إبني مفيش جبل يتحمله ....و عمال يبكي 
طب قولي مالك ...إحكيلي  ...فيه إيه ..عاوز إيه أعملهولك .....
المهم قالي خلاص العمل عمل ربك بقى.....
و لقيته بيقول هو ممكن ربنا  يسامحني ....
- قلت له انت عملت ايه؟؟

.قال واحد ظلمته ...ظلمته جامد ..ما رحمتوش و لا رحمت عياله ....ما صعبش علي منظره و هو بيبكي و يقولي مستنيك قدام ربنا ....قلبي ما رقش لتلات ولاد وبنتين و امهم و هو ماشي بيهم بعد ما سرقت شقاه.... والراجل حرفيا الدموع غرقت الملاية...
إحكيلي يا عم أحمد 
قال الطمع ...أيوة الطمع و موت القلب ...الراجل كان شريكي في تجارة كبيرة و ليه معايا نصها و من طيبته سابلي كل حاجة أديرها ، و علشان أنا كان علي مخ إبليس طلعته من التجارة مالوش مليم احمر و مديون كمان....و الناس كانت عارفة إني ظالمه بس انا كنت مرتب ورقي كويس قوي ...و قعدات و جري و محاكم و ما طالش مني و لا مليم
و أنا كل مدى كل ما قلبي بيموت و بيجمد و أقول عيالي أولى و خلاص لما غلب مني .... باع بيته و طلع من البلد 
و يوم ما طلع عدى علي في الوكالة و قدام الناس قالي أنا ماشي بس مستنيك قدام ربنا .....و لا هز كلامه فيا شعرة 
و مشي ...و أنا الدنيا إحلوت معايا بشكل ...لدرجة إني صدقت إن دا مالي و حلالي و حجيت كام مرة و عملت كام عمرة و بقت الفلوس معايا مش عارف عددها 
كبرت العيال و إتعلمت و منهم اللي مسك معايا التجارة 
و عربيات و دنيا و أول ما تعبت رموني في البيت زي الكلب 
و كل حاجة تبعهم ....و لما حسيت إن التعب بيزيد قولتلهم فيه واحد ليه عندي دين و عاوز أسدده 
قالولي يوم القيامة إبقى قابله و سدده و الراجل بيعيط بحرقة ....
قال إفتكرت كلمة الراجل لما قالي مستنيك قدام ربنا
و بعت عرفت عيال الراجل و إنهم ما شاء الله بقوا في دنيا تانية و أبوهم مات من فترة و لما طلبت يسامحوني ...قالولي و الله لو دخول الجنة واقف علي حسنة مننا ما هتاخدها 
و عيالي لما لقوني تعبتهم 
رموني في المستشفي و بقوا يبعتولي أي حاجة مع سواق ولا حاجة و لا حد منهم لف علي 
و فعلا ما كانش حد بيلف عليه إلا واحد إسمه محسن سواق في الوكالة.....
قالي كل ما أغمض عيني أشوفه قدامي بيقولي خلاص ما بقاش إلا القليل و حقي هاخده 
كل ما أغمض عيني أشوفه قدامي ...عذاب يا ابني ...عذاااب يا بني ربنا ما يكتبه عليك ....و تقولي ألم الكيماوي
و الراجل صوت عياطه لم الناس علينا .......
بس أصعب جملة الراجل دا قالها و الله  قشعرت منها ...لما  قال أنا بقالي شهر كل ما انام أشوف مكاني في جهنم 😥😥😥😥
و مات خالي و في يوم روحت بعد موت خالي أسال عليه قالولي مات
لوحده ما كانش حد معاه 
العبرة

تعديل المقال