فرحت كثير .. صرت عروس ولبست الفستان الأبيض
وصرت ملكة الحفلة .. والكل كان فرحان معي ومبسوط .. صح كنت زعلانة لإني تركت بيت أهلي بس بنفس الوقت كنت مبسوطة لإني أسست حياة جديدة .. وراح أكون أحلى أم وزوجة بالعالم ..
وبعد زواجي بشهرين زوجي عمل حادث ودعسه باص طلاب .. لما وصلنا الخبر كان الكل منهار .. ما كنت بدي إشي بالدنيا إلا إنه زوجي يكون بخير ..
دعينا كثير وبكينا كثير .. وربنا إستجاب .. وطلع زوجي من الموت بإعجوبة ..
وبسبب هالحادث حياتنا انقلبت .. بسبب الحادث الدكاترة حكولنا إنه مستحيل نفرح بيوم من الأيام ويكون عنا طفل .. لإنه زوجي مستحيل يخلف ..
كل إشي كنا نحلم فيه ما راح يتحقق ..
و زوجي عمار كان منهار وحزين .. وقتها حاولت أخفف عنه وحكيتله إنه إللي صار ما إلك ذنب فيه .. والزواج مش بس بيت واولاد .. الزواج مودة ورحمة .. الزواج حياة .. مشاركة .. أحط راسي على كتفك وأحس معك بالأمان .. ويكون همنا واحد .. نتحدى المستحيل لنقدر نكمل بسعادة ورضى ..
ومرت الأيام والأشهر .. وبيوم بتذكر كنت مروحة من شغلي ، وشفت ختيار كبير بالعمر لبسه ممزع وكان بردان وبرجف .. وكان قاعد بزاوية وحاط قدامه كرتونة عشان تمنع عنه الهوا البارد .. رحتله وحاولت أفهم قصته وطلع مقطوع من شجرة وما إله حدا ولا إله بيت غير هالزاوية إللي قاعد فيها .. ما لقيت حالي إلا بدورله بالمحلات على حرام وجاكيت ولبس دافي .. اشتريتله كل إشي من اكل ولبس ورجعتله .. كانت فرحته كبيرة لدرجة إنه صار يبكي .. قلبي ما خلاني أترك هالختيار بالشارع ، رنيت على عمار وأجاني .. وبعد كلام طويل أخذنا الختيار لعنا عالبيت وثاني يوم بعد الإقناع وافق ييجي معنا على مركز رعاية وكان خايف ومرعوب ، بس لما شاف ناس من عمره قاعدين ودفيانين وقربو منه وصاروا يحكو معه إرتاح وفرح .. ولما إجينا نتركه مسكني من إيدي وحكالي ربي يجبر خاطرك ويفرج همك يا بنتي .. كنت فرحانة بهالدعوة قد الدنيا ..
وكنا نزوره كل فترة نتطمن عليه ونغير جو معه ونروح ..
وبعد سنتين مرضت مرضة قوية ، لدرجة ما كنت أقدر أقوم ..
أخذني عمار على الدكتور وكتبلي دوا وحكالي إنه هالدوا فيه كرتزون ولازم أعمل فحص حمل عشان يتطمن .. عمار حكاله إنه ما في حمل وإنه هو عقيم ..
نزل عالصيدلية واشترالي الدوا وروحنا عالبيت.. بس انا كنت خايفة آخذ الدوا .. طلبت من أخوي يجيبلي تست حمل بدون ما يعرف عمار .. وفعلا هاد اللي صار
كنت عارفة إنه ما في حمل بس كان عندي ثقه بربنا كبييره .. وفجأة طلع ايجابي طلع خطين .. والله ايجابي .. طلعت لجوزي احكيلو انا حااامل .. ما صدقني وقلي بلا هبل .. حكيتلو والله حااامل .. ما قدر يستوعب .. ولا حتى فرح لإنه فاقد الأمل .. بس أخذني على مختبر عشان يفرجيني إنه كلامه صح وكلامي غلط .. بيجي دكتور المختبر بيحكي الف مبارك حامل وهون عمار ينهار وينزل يسجد ويعييط .. كل إللي بالمختبر نزلت دموعهم على فرحته وانا حسيت قلبي راح يوقف ....
والحمدلله هلأ أنا حامل بالشهر التاسع بستنى البنوتة إللي حنسميها نور وإللي حتكمل فرحتنا بجيتها ❤
من قصتي حابة اعطي طاقه ايجابيه
إذا إحنا البشر عنا رحمة وبنجبر بخاطر غيرنا وغيرنا بدعيلنا
طيب ما بالكم برحمة رب العالمين .. ما في مستحييل على ربنا وقد ماحكو الدكاتره إنه ما في أمل بس رحمة رب العالمين بتوسع كل إشي .. ربنا إستجاب
الف حمد وشكر الك ياارب
دعووواتكم امانه
ويارب يارب الي جبر خاطري يجبر خاطركم جميع
حقيقية وليست من وحي الخيال